“Könüllü DOST” Proqramı 12 aprel 2019-cu il tarixindən fəaliyyətə başlayıb.
DOST Agentliyinin könüllülük siyasəti könüllü fəaliyyətinə yeni yanaşmanın nümayiş etdirilməsinə və Agentliyin bu fəaliyyətin effektiv təşkili sahəsində qabaqcıl qurumlardan birinə çevrilməsinə yönəlmişdir. DOST Agentliyi tərəfindən təşkil olunan könüllülük proqramının əsas məqsədləri aşağıdakılardır:
Azərbaycanda aparılan gənclər siyasətinə və könüllü hərəkatına dəstək verilməsi;
İctimai iştirakçılığın təşkili və sosial məsuliyyətlilik hissinin artırılması;
Dövlət-vətəndaş münasibətlərinin inkişaf etdirilməsi;
Sağlamlıq imkanları məhdud və əlilliyi olan şəxslərin cəmiyyətə inteqrasiya olunması;
Gənclərin praktiki bilik və bacarıqlarının artırılması ilə onların əmək bazarına hazırlanması;
“DOST” mərkəzlərində göstərilən xidmətlərin keyfiyyətinin və operativliyinin yüksəldilməsi;
Pensiyaçıların asudə vaxtının səmərəli təşkil olunması və aktiv yaşlanmaya töhfə verməklə onların cəmiyyətə reinteqrasiyası;
əkandan asılı olmayaraq müxtəlif sosial statuslu şəxslər üçün könüllülüyün əlçatanlığının təmin olunması.
DOST Agentliyi “DOST” mərkəzlərində və digər müvafiq layihələrində könüllülük fəaliyyətinin təşkil olunması üçün “Könüllü DOST” proqramını həyata keçirir. Proqram fərqli ictimai və yaş təbəqələrini əhatə edən üç əsas altproqramdan ibarətdir:
- “Gənc DOST” altproqramı 16-29 yaş aralığında olan gənclərin, o cümlədən əlilliyi olan şəxslərin vətəndaşlara xidmət sahəsində təcrübə qazanması, ilkin işgüzar vərdişlər əldə etməsi, fərdi inkişafı və karyera yolunda ilk uğurlu addımlarının təməlinin qoyulması məqsədi daşıyır. Könüllülük fəaliyyətinin müddəti iki aydır və iş prosesi, bir qayda olaraq, gündəlik olaraq hər növbədə üç saat olmaqla üç növbədə təşkil olunur;
- “Gümüşü DOST” altproqramı pensiyaçıların cəmiyyətə reinteqrasiyası, nəsillərarası təcrübə və bilik mübadiləsi, yaşlı şəxslərin asudə vaxtının aktiv təşkili və fəal yaşlanması məqsədi daşıyır. Könüllülük fəaliyyətinin müddəti iki aydır və iş prosesi, bir qayda olaraq, həftənin iş günləri olaraq hər növbədə dörd saat olmaqla, iki növbədə təşkil olunur;
- “Virtual DOST” altproqramı təhsil, təlim, tədqiqat, PR, konsaltinq və s. sahələr üzrə verilən tapşırıqların onlayn qaydada könüllülər tərəfindən yerinə yetirilməsi məqsədi daşıyır. Bu altproqram əsasında müvafiq sahələr üzrə peşəkar mütəxəssislər, ictimai xadimlər, habelə əlilliyi olan şəxslər kompüter, planşet və ya smartfondan istifadə etməklə ofis və ya evlərində könüllü kimi fəaliyyət göstərmək imkanına malik olur;
- “Korporativ DOST” altproqramı cəmiyyətdə ictimai-sosial məsuliyyət hissinin artırılması, müxtəlif təşkilatların korporativ sosial məsuliyyətlilik proqramlarının daha effektiv formada təşkili və sosial sahədəki təşəbbüslərin qarşılıqlı faydalı əməkdaşlıq çərçivəsində ehtiyac olan sahələr üzrə istiqamətləndirilməsi məqsədi daşıyır.